வளர்ச்சிக்கான வகுப்புகளை உருவாக்கும் விருதுநகர் கிராமப்புறப் பள்ளி ஆசிரியர்கள்

பிரதான் ஒருங்கிணைப்பில் விருதுநகர் மாவட்டத்தில் 50 மாலைநேரக் கல்வி மையங்கள் செயல்பட்டு வருகின்றன. இக்கல்வி மையங்களை மேலும் சிறப்பான செயல்திட்டங்களுடன் முன்னெடுத்துச் செல்வதற்கான வழிமுறைகள் மற்றும் ஆசிரியர்களின் பங்கேற்பு குறித்து கல்வி மைய ஆசிரியர்களுக்கான பயிற்சி நடைபெற்றது.

கலைவழிக் கற்றல், கற்பித்தல் முறைகள் மற்றும் கிராமப்புறச் சூழல் ஆகியவற்றை அடிப்படையாகக் கொண்டு, மாணவர்களின் கற்றலை மேம்படுத்துவதற்கான பல்வேறு முயற்சிகளை மேற்கொள்வது குறித்து ஆசிரியர்களுக்கு வழிகாட்டப்பட்டது.

பள்ளியில் வழங்கப்படும் பாடப்பணிகள் மற்றும் வீட்டுப்பாடங்களை மாணவர்கள் முடித்த பிறகு, அவர்களுடைய தனிப்பட்ட கலை ஆர்வங்களையும் திறமைகளையும் அறிந்து, அவற்றை வெளிப்படுத்துவதற்கான வாய்ப்புகளை உருவாக்க வேண்டும் என்பதும் பயிற்சியில் வலியுறுத்தப்பட்டது.

உதாரணமாக, பாடும் திறமை கொண்ட குழந்தைக்கு பாடுவதற்கும், நடனத்தில் ஆர்வமுள்ள குழந்தைக்கு ஆடுவதற்கும், ஓவியம் வரைவதில் ஆர்வமுள்ள குழந்தைக்கு வரைவதற்கும் வாய்ப்புகள் வழங்கலாம். அந்தக் குழந்தைகள் தங்கள் திறமைகளை வகுப்பில் உள்ள மற்ற குழந்தைகளுக்கு முன்னிலையில் செய்து காட்டுவதற்கான சூழலை உருவாக்குவதன் மூலம், அவர்களிடம் தன்னம்பிக்கையை வளர்க்க முடியும்.

அதேபோல், ஒரு குழந்தையின் திறமையை மற்ற குழந்தைகள் பார்ப்பதும், பாராட்டுவதும், அவர்களுக்குள்ளும் புதிய ஆர்வங்களை உருவாக்கும். இதன் மூலம் ஒவ்வொரு குழந்தையும் தன்னிடம் இருக்கும் திறமையை அடையாளம் காணவும், அதை வெளிப்படுத்தவும் வாய்ப்பு கிடைக்கிறது. இத்தகைய செயல்பாடுகள் மாலைநேரக் கல்வி மையத்தின் மீதான குழந்தைகளின் ஆர்வத்தையும் அதிகரிக்க உதவும்.

மேலும், விருதுநகர் மாவட்டத்தின் கல்விச் சவால்கள், கிராமப்புறக் கல்விச் சூழல், மாணவர்களின் குடும்பப் பின்னணி மற்றும் பொருளாதாரச் சூழல் ஆகியவற்றைக் கருத்தில் கொண்டு, ஒவ்வொரு மாணவருக்கும் ஏற்ற வகையில் கற்பித்தல் செயல்பாடுகளைத் திட்டமிட வேண்டியதன் அவசியம் வலியுறுத்தப்பட்டது.

ஒவ்வொரு கிராமத்திற்கும் அதன் தனித்துவமான சூழலும் தேவைகளும் உள்ள நிலையில், அனைத்து மாலைநேரக் கல்வி மையங்களுக்கும் ஒரே மாதிரியான செயல்பாடுகளை வழங்குவதற்குப் பதிலாக, “ஒவ்வொரு கிராமத்திற்கும் ஏற்ற வகுப்பு” என்ற அணுகுமுறையில் செயல்பட வேண்டும் என ஆசிரியர்களுடன் கலந்துரையாடப்பட்டது.

ஒவ்வொரு கல்வி மையமும் தனது கிராமத்தின் குழந்தைகள், பெற்றோர்கள், பள்ளிச் சூழல் மற்றும் உள்ளூர் தேவைகளைப் புரிந்துகொண்டு, அதற்கேற்ற செயல்திட்டத்தை உருவாக்கி செயல்படுத்துவதற்கான வழிமுறைகள் ஆசிரியர்களுடன் இணைந்து உருவாக்கப்பட்டன.

கல்வி என்பது பாடங்களை மட்டும் கற்பிப்பது அல்ல; குழந்தைகளின் சூழலைப் புரிந்துகொண்டு, அவர்களின் திறன்கள் மற்றும் தேவைகளுக்கு ஏற்ப கற்றல் வாய்ப்புகளை உருவாக்குவதே வளர்ச்சிக்கான வகுப்பறையை உருவாக்கும் என்பதை அடிப்படையாகக் கொண்டு இப்பயிற்சி அமைந்தது.